ሕዳር 29 አያሙ አሳስ ሞሸቤ 20 ታኝጊርሌ ዩትገደርዛል መሀድ መሐዲናች ዋ ኡመታች ሞዩው ሰበብ ሞኛቤ ሕዳር 19/2018 አመት ጆጉል ኡስጡቤ ዚደለጉ ኦር ኡጋች ዋ መጅሊስዞ ዚሔጀሴዩ አታያቹ ሶዛ ሱብሒ12፡00 ሰአቤ ሜገል መኔዘፍ ዋ መጥረግ በርናሚጅ ሀረሪ መሐድ መጅሊስ መስኡላች ዋ ደላጊያች ዚትራኻቡቦ አታይቤ አሜሐሩ፡፡

ሀረሪ መሐድ መጅሊስ 4ታኝ ዶር ጆጎል ሔጀሶት ዲላጋ ሒጣ ዞጠአሌው አታይ አሳሰቤ ዚትገደሩ ሀረሪ መጅሊስ አፈ ኤይዲ ጌስሲ ሙሕየዲን አሕመድ ዚትራኽቡቦ አታይቤ ዲላገዞው ኤገላ::

‎ዲባየቤም ሀረር ጆጎል አለም ሑቁፍ ቁራስነትቤ ዪኒስኮቤ ዚትሴጅልቲ መኽነዜው ቄቀሉማ አሲመዜው ነባሪያችዜሌ ሙች ዘያራችሌ ቲማርኺዛት ሞሽሌ ቤቀድ ዚናሬ ሲፉዜ ዋ ቦረዜው መርገገብሌ ሀረሪ መሐድ መጀሊ 4ታኝ ጊርሌ ዚትሊያዩ አታያችቤ ሳምዞው መንስእቤ ዳይሐዋዞባሕ መኽነቤ ዚገረብዞ አታጮቱ ያሽቤ ዛልነቱ በያን አሹ::

‎ሞይዞቤም ሀረሪ መጅሊስ አፈ ኤይዲ ዚትገደሩ ጌስሲ ሙሕየዲን አሕመድ ሒጋኝ አፈ ኤይዲ ዚትገደሩ ጊስቲ አሚና አብዱከሪም: መክተባ ጋርዞ ላቂ መስኡልች: ሐታፊያች አታይዞቤ ተረኽቡ::

ሀረሪ መጅሊስ አትዋሕቤ ነትቤ ዩትኤቀድዛል አባዲር ወረዳ፣ አሚር ኑር ወረዳ፣ ሐረር አሲማ ጠብቲ ጋር፣ አዳ ቁራስ ዋ ዘያርነት ኢዳራ ዋ ሚይዋ ኩእ አቡሱልጣባ ዚ4 ጂሐ 2018 አመት አቡራ አሜሐሮት ሒካሞት ለአይቤ ሒርጊዋ ሚርጊ አሜሐራ፡፡

ሒርጊዋ ሚርጊዞቤ ዚትረኻቡ ሀረሪ መሐድ መጅሊስ አፈ ኤይዲ ዚትገደሩ ጌስሲ ሙሕየዲን አሕመድ ዛዮኩትቤ ሀረር አኸእ ወቅቲቤ ዛልቲባ ጂሐ በጂሕ ዘጋሕ ኔሮት ዋ ሳዮት ዲላጋቹ ዚትዋሐባ ኹንቲቤ መኤቀድማ ዩቴቀብዛል ጊብቲው መምሐጥሌ ወረዳች ዋ መክተባ ጋራች ዚኮረኦ አቡራ አሳስስቤ ኡመትዞው ተናፋኢ ያሽዛሉ ዲላጋቹ መቄመስቤ ኡኑስ ዋ ጢጢት ዌጠኖታችቤ መዌጠንቤ፣ ኢጂ ሲነትቤ፣ ነዛፋ መቄረሕ ዋ ዩትኮኡ ወሳኽ ሚይ አካዞቤ ዩጭባዛል ኡጋው ዳይቤ መትዋሐብማ መድለግ የትኺሽዛልነቱ ገለጡ፡፡

ኦርኩትዞም ጆጉል ኡስጡ ዋ ሺርቲዜቤ ዩትረኻብዛሉ ታሪኺያ ጋራች፣ አዋች፣ መስጊዳች ዋ ኡጋችዜው ቤቀድ ዚናርቲባ ሲፋዜ ኩፎኝ መርገገብሌ የትኺሹ ማእሉማታች ዋ ቢሳሎታች አከዞቤ ዩኹኑኩት መድለግ የትኺሽዛል ነቱ አሴነኑ፡፡

አርራዞቤ ዚትራኻቡ ዩጠርሐዩ ሀረሪ ሑስኒ ሑኩማ ኢዳራች ዋ ወረዳች ገረብዚዩደሌ 2018 አመትቤ ዚትጌበሉ አቡራቹ አከዞቤ ወቅቲቤ ዋ ፊጥነቤ ኢሾትዋል ማሸሌ ቁጭነትቤ ዩደልጉዛሉነቱ አቴወቁ፡፡

65 አመት ቤቀድ ኢር ኪልቱቡእ አመሪካ ባድ አቂቤ ዚትበሰለማ ዚትሰነዳ ሀረሪ ሉኃ ቃሙስ ኪታብ ሀረሪ መሐድ መጅሊስባሕ ተቃበዶት ኻና፡፡

ሀረሪ መሐድ መጅሊስ አፈ ኤይዲ ዚትገደሩ ጌስሲ ሙሕየዲን አሕመድ፣ ሒጋኝ አፈ-ኤይዲ ዚትገደሩ ጊስቲ አሚና አብዱከሪምሌ ሀረሪ ሉኃ ቃሙስ ኪታቡ ዘቀበዱ ጌስሲ ኑረዲን አብደላ ዚኻኑሳ ተቃበዶት አርራዞቤም ዚትገደሩ ጌስሲ ሙሕየዲን አሕመድ ዛዮኩትቤም ሀረሪ ሉኃው መሌቀሌ ዋ መኔረሌ ኢር ኪምቱቡእ አውሮፓ ባዳችቤ ዚትሜሐሩ ቢሳሎታች ዋ ሰነዳች ጊዲር ፋይዳ ዛለዪነት ገለጡማ ይ ኩቱቡ ቀርሐዋዝ ደረጀቤ ዚሰጤዩ ሐዲያው ኪም ዩጠርሐ ሀረሪ መጅሊስ ኩፎኝ አከዞቤ ኮፒዞው መዴጀማ መቅበድዚዩቤ ገለታ አገበኡ፡፡

ዲባየቤም ሀረሪ ዳይሐዋዝ ዩው ዩመስሊ አዳዞው፣ ታሪኽዞው፣ ማነትዞ ዋ ሉኻዞው መቄረሕሌ ዋ መሌቀሌ ከቀር ሀዋዝ ደረጀቤም ዩው የመስሊ ጊዲር ዚባድ ዋ ዚኡመት መሰኡሊያዞው መትዋጠእ ገረብደሌ አላይዞሌም መሕዲጃ መኽነዛልባነቱ ገለጡ፡፡

ጌስሲ ኑረዲን አብደላ ገረብዚዩደሌ 65 አመት ቤቀድ ኢር ኪልቱቡእ አመሪካ ባድ አቂቤ ዚትበሰለማ ዚትሰነዳ ሀረሪ ሉኃ ቃሙስ ኪታብ ሐዲያኩትቤ ዚሰጡዩ ሐጂ አብዱልዋሲ ዩሱፍ መሐመድ ወርፋሌ ገለታ ኢሰገበኡ ቤሔርሌ ፕሮፌሰር ዎልፍ ሌስላው ሀረሪ [ ጌይ ሲናን ] ቃሙስ ኪታብ 240 ሰፍሐ ዛላ ዩ ኪታብ ኢቲዮጵያ ሒልቂቤ 1950 ቢሳሎት ዋ ፋሕሲዞ ዚኻነቤው ዚኻነሳአ ዚትከመሌውም 1952 ፈረንጂ ሒልቂቤ March 29 ,1960 GC ዚኪታብ ሰነድ ዲላገዞ አከመለማ ጠብኢሌ ቀረባ ባይቲቤ አቴወቁ።

የኽኒማም ሀረሪ ሲናን ቃሙስ ኪታብ ዎልፍ ሌስላው ዚትበሰላ ሰነድ Etymological Dictionary of Harari ጠብኢሌ ዚቀረቤው ፈረንጂ ሒልቂቤ July 15, 1963 GC ዚኻነሳአ አኻእ ወቅቲቤም 62 አመት ቤቀድሌ መኽነዞው አቴወቁ፡፡

ዲባየቤም ዩ ቃሙስ ኪታብ ሀረሪ ሉሃቤ ቢሳሎት ዋ ደፍደፍቲ ያሹ ቃማችሌ፣ ቱሪዚምሌ ዋ ሲናንዞው መሌቀሌ ጊዲር ፋይዳ ዛላ ኪታብ መክነዞው አሴነኑ፡፡

አርራዞቤም ሀረሪ መሐድ መጅሊስ አፈ ኤይዲ ዚትገደሩ ጌስሲ ሙሕየዲን አሕመድ ሒጋኝ አፈ ኤይዲ ዚትገደሩ ጊስቲ አሚና አብዱከሪም ተራኻቡ፡፡